Read sinjaal

De strjitte is men gau oan wend
as hâldfêst foar de fuotten,
dy’t dêrtroch yn lykwicht bliuwe,
fluorders meitsje dat bekend.

Op knibbels leit er yn it sicht
fan elkenien op fuotten
nei de winkel, net ferplichte,
mar de fluorder docht syn plicht.

Is ’t winter, dan draacht hy in sjaal
tsjin ’t sigen yn de nekke,
stien nei stien giet troch de hannen,
helder klinkt syn byldferhaal:

‘Tink nei oer wat ik witte lit,
dat jim de nekke brekke
as de fluorder derby sitten
giet, gjin stien mear klinke lit.’