november 30, 2018
fan ûnbekend*
Is der ea safolle moarde
as troch Thyestes én Atreus,
twa bruorren, moardners fan de tredde broer?
Om’t sy fersteurden sa de oarder,
hat de heit har lûd ferflokt.
Beide bruorren hawwe fochten
mei fjouwer eagen op ’e troan
fan de Mykeners, mar it hold net oer,
Thyestes kriich de earste rjochten,
hat Atreus syn goudflues socht.
Dêrtroch kriich hy noch mear rjochten,
mar Hermes hold it mei Atreus
en liet de sinne eastlik ûndergean;
Thyestes kaam ferkeard terjochte,
hat fergees syn soannen socht.
Want syn soannen waarden deade,
ta iten sieden foar de heit
en oanbean troch syn broer Atreus as lean
foar ’t stellen goudflues, dat hy skearde
fan it skiep, wat goaden skokte.
* Yllustraasje ‘Atreus op ’e troan’
november 29, 2018
fan William Turner*
Lit de sinne heger klimme,
want de dize hâldt de strielen tsjin
of jout de moarntiid sa de glâns
dy’t djipper is op ’t ierdske flak?
De himel soarget foar gewin.
Hûnderttûzen fisken swimme
noch, de nacht joech lykwols net te min;
de fiskers wiene ’t wekjen mânsk
en brochten krekt de boat teplak,
fersetten no mei drank it sin.
Froulju ha de sliep ôfbrutsen,
foar ’t gefoel wie it noch neare nacht,
’t ferstân brocht harren op it strân
noch foar’t de boaten sylden út
de dize, sulver wie de fracht.
Is it mes yn ’t fiskfleis stutsen,
krijt de sinne oer de dize macht,
dan skoot it seebyld nei it lân
en sprekke fiskers fan de bút…
gjinien slacht noch de himel acht.
* William Turner (1775-1851)
Skilderij ‘Fisk by it lemieren’