augustus 7, 2017
Withoefolle skippen lizze
yn dy iene wike fan it jier
yn ’t wetterpoarteplak…
wat skip it wurdt, wa sil it sizze?
Is it dy boat of krekt dizze?
Allegearre lizze foar ’t plezier,
mar ek foar ûnderdak…
wat boat it wurdt, wa sil it sizze?
Ien kin alle jierren risse
folle mear as hiel de silersfloat,
’t giet hinne en ek wer,
it Poiesz-skip bliuwt net oeren lizzen.
Withoefolle sille ’t misse,
foer net nei de Snitser mar dy boat,
fan ’t jier is hy de stjer,
dus sil gjin minske him leechlizze.
augustus 6, 2017
Wyn en wolken nûgje skippers út
om mei fol túch de Ie te brekken,
want de earste slach is wer foar Grou;
de spanning sjit fan kiel nei kút,
de Tynje is foar skûtsjegekken.
Foar de fok fan Grou stiet ien al klear
om oan te jaan wat op te stekken,
want by it starten stekt it gau te nau;
mei ’t skot sjit elk skip as in spear
de striid yn… mei de skûtsjegekken.
Wyn en wolken trune skûtsjes oan
om ’t skom te spielen oer de dekken,
want sa rekket elkenien yn tou;
sjedêr ‘Doarp Grou’, no al foaroan…
de ear is foar de skûtsjegekken.
