Reus en dwerch

fan ûnbekend*

Lykas de berch fielst dy ferlern
yn de fallei fan Ordesa:
wat is in minske tusken hichten?
Noch lytser as in krûpend bern.

De berch ferlear syn wite top
dy’t stadich nei de lichte glied
om as kâld wetter del te kommen,
hy kaam der nea wer boppe-op.

Wat ûnder bliuwt, is de fallei,
oantinken oan it skowend iis,
dat út ’e berch de stikken hapte,
dat selskip is foargoed foarby.

As selskip hasto noch de berch,
dy’t folle âlder is as dy,
as krûpend bern sjochst nei syn hichte:
de goede reus en do as dwerch.

* Foto ‘Ordesafallei yn de Pyreneeën’