It plak fan ’t hôf fan Eden
wie lykas yn twastreamelân
in ripe frucht yn elke hân,
de fuotstap fan de frede
nei boarnen foar de toarst.
De macht fan ’t grutte Babel
hat minsken oan it streamen brocht
as balling nei ferlern gefjocht,
as Kaïn tsjin broer Abel,
in libbenslange toarst.
It lot fan finzen Joaden
wie treurje by de âlde stream,
de liere yn de wylgebeam,
gjin fuotstap fan Gods boade,
wol smachtsje fan de toarst.
Nei libbenslange jierren
stie op Jesaja, de profeet,
syn streamend wurd foar ’t folk yn need
hat boarnen iepenbierre
foar ’t dwêsten fan de toarst.
Jim earmen kinne drinke,
hear ’t brûzjen fan de nije stream,
de liere út ‘e wylgebeam,
lit alle snaren klinke,
gean sûnder toarst op wei.
Sjoch ek: Religy Ierdefearttsjinst
|
