Kom, folk fan God, op fuotten,
fan jong oant griizjend âld,
fan boartsje oant lang wrotte,
sjoch, foar ús leit de wrâld,
dy’t noeget foar de reis
yn harmony fan sfearen,
ek stoarmen dy’t lûd beare,
dochs ien folk ûnderweis.

Rembrandt

Sjoch ’t folk fan lang op fuotten
dêr by de Sinaï,
it heart fan ’t hillich moatten
yn folle harmony;
sa’t Mozes sprekt de taal
op grûn fan de Tsien Wurden
om ’t hillich folk te wurden
giet troch it âld ferhaal.

Sjoch ’t folk oan Babels streamen
fier fan Jeruzalem,
foarby gean al har dreamen
oant klinkt in kleare stim;
Tsien Wurden wurde mear,
in ienheid yn de boeken
om ûnderweis te brûken,
it libben nimt in kear.

Sjoch ’t folk mei bûne hannen
oan ’t miel mei bargefleis,
lykas yn heidenlannen
gean goaden mei op reis,
mar ien man giet net mei,
hy rint syn paad moedwillich
en bliuwt yn ’t lijen hillich,
foar him wurdt it wer dei.

Sjoch ’t folk mei hûndert fragen
oan Him út Nazaret,
Hy moat it jok mar drage,
Him hâlde oan de wet;
Tsien Wurden wurde ien,
de leafde jout it measte,
dan wurdt de lêste earste
op wei út ‘e woestyn.

Sjoch ek: Religy Tsjinst fan de ienheid