september 26, 2020
fan ûnbekend*
As preker wie ik foarst fan Israel,
ik lei my nammentlik op wiisheid út,
gie troch it libben mei dy namme,
mar it kaam net ta in einbeslút.
Mei iepen eagen gie ’k op ûndersyk
nei wat der allegearre wol net wie
op ierde, tusken grûn en himel,
’t wurk wie swier, ik kaam net út ’e rie.
Wat altyd krom west hat, wurdt grif net rjocht,
wat foar it each net is, telt ek net mei,
dy wiisheid ha ik fûn, wat mear is
as in kening earder goed foar sei.
Ut wittenskip en dwaasheid kaam foar ’t ljocht
dat ik allinnich mar de wyn neijei,
mear wittenskip jout noch mear lijen,
gâns fertriet komt út ’e wiisheid wei.
* Foto ‘Fertriet’
september 25, 2020
fan John William Waterhouse*
Sy koe tsjoene op har eilân
foar de westkust fan ’t Romeinske ryk,
liet Odysseus har keunsten sjen
fan bargen yn it slyk.
Odysseus kaam mei syn mannen
op har eilân oan, ’t gie foar de wyn,
in part kriich fan har tsjoendersdrank,
feroare doe yn swyn.
Hermes joech in krûd as tsjingif,
sadat Kirk gjin ynfloed op him hie,
de bargen kamen út ’e stank
as mannen fan de die.
Kirk liet Odysseus gewurde,
joech har skurte oan syn ynfloed oer,
dat berne waard in jonkje, bern
dat nei de kust ta foer.
Odysseus foer mei syn mannen
ta fertriet fan Kirk nei ’t eigen lân,
sy joech him rie oer ’t Deaderyk,
sa kaam er libben oan.
* John William Waterhouse (1849-1917)
Skilderij ‘Kirk biedt Odysseus de beker oan’