juli 30, 2021
fan Jacob Jordaens*
fan ûnbekend**
Lit de Satyrs en Silenen
’t spul mar spylje fan jûchhei:
‘Hoera foar Dionysos,
mei syn nimfen dûnset hy.’
Satyrs mei har bokkepoaten,
lange earen en in sturt,
ha altyd nocht oan ûnnocht,
plichtsbesef… hat dat wol nut?
Jou Silenen mar de romte
om frijút te fjouwerjen
as hynders, sy ha nocht oan
Dionysos’ leave bern.
Lit de Satyrs en Silenen
mei de nimfen dûnsje yn
de nacht op, Dionysos
soarget foar de swiete wyn.
* Jacob Jordaens (1593-1678)
Skilderij ‘In satyr’
** Byldsje ‘Silenen’
juli 29, 2021
fan Melchior d’Hondecoeter*
Wat hoanne sil fiktoarje kraaie
yn in wrâld fan liberaal geweld:
de frijheid fan de inkeling
op kosten fan de maatskippij,
it is de macht dy’t telt.
De hinnen kinne net mear skaaie,
krije gjin gelegenheid om oan
de kost te kommen foar ’t geslacht,
se binne der ferplichte by,
foar har grut machtsfertoan.
It giet fan striid nei elkoar naaie,
middels floeie út it hillich doel:
it stribjen nei de heechste macht,
de winner is allinnich frij,
hy wurdt net waarm, bliuwt koel.
Dochs sil er lûd fiktoarje kraaie,
want hy is in echte liberaal:
de frijheid fan de inkeling
op kosten fan de maatskippij,
de dea is syn ferhaal.
* Melchior d’Hondecoeter (1636-1695)
Skilderij ‘Hoannestriid’