november 13, 2021
fan ûnbekend*
Jesaja
Yn swym leisto op strjitte,
dronken troch de grime fan de Hear,
want dronken hasto út syn beker
oant dy leech wie oant de lêste drip.
Dyn soannen litte ’t sitte,
want sy lizze lykas do yn swym,
beskonken fan de Hear syn grime,
net in soan dy’t dy de hân tastekt.
Wurd dêrom wekker, wekker
wurde, riis oerein, Jeruzalem,
do hoechst tenei net mear te drinken
út ’e tsjelk fan syn grammoedichheid.
It smakke dy net lekker,
dus ferdrukkers, dronken wurde jim,
dy’t stampend oer dy hinne wâden,
lykas wie dyn rêch in stripe grûn.
* Yllustraasje ‘Tsjelk’
november 12, 2021
fan Henry Fuseli*
Theiresias seach om him hinne,
nijsgjirrich as er altyd wie
nei wat yn Thebe barde;
mei te sjen joech hy de rie:
‘Der is in wrâld te winnen.’
Hy wie nijsgjirrich nei goadinnen,
hoe’t sy har klaaiden, ek wannear’t
sy yn it neaken stiene;
’t gie doe op ’e kop ferkeard…
Athena as freondinne?
Wol nee, Athena stie fier boppe
Theiresias, al wie sy bleat;
hy moast syn sicht belije,
seach mei ’t swart foar eagen neat…
koe hy it noch fier skoppe?
Wis wol, want hy waard kompensearre
troch Zeus, yn plak fan sicht soe hy
de spraak as nije jefte krije:
as profeet brocht hy ’t folk by
wat oan ’t bestean mankearre.
* Henry Fuseli (1741-1825)
Skilderij ‘Theiresias fertelt de takomst
oan Odysseus’