december 6, 2021
Venezuela
lân fan sinne,
baaiend yn de oalje, ryk
oan oerwâld mei in wrâld oan dieren,
folk dat wiis wie mei de republyk,
mar dat wie foarhinne.
Venezuela
suchtsjend ûnder
’t skrikbewâld fan elk gelyk,
net learend fan de wrâld fan dieren,
dêrtroch reitsje de ferhâldings bryk,
elk is bysûnder.
Venezuela
oer de grinzen
flechtet folk dat neat mear hat,
wat seit dan noch de wrâld fan dieren?
Grut gelyk, ferlit de republyk,
dy hâldt jim finzen.
Venezuela
net oanlizze
yn stêd Snits, dy leit al fol
mei folk dat neat hat mei de dieren
út ’e frjemdte, jou har fan replyk:
wy ha ’t te sizzen!
december 5, 2021
fan ûnbekend*
Gjin see kin ’t leger keare
as it stribjen is de macht
oer lange grinzen hinne,
langer as it eigen lân…
de macht is oan de hearen.
Soldaten moatte sjitte
op kommando fan de macht
dy’t út is op it winnen
fan gebiet yn fijâns lân…
de hearen kinne ’t witte.
Japanske hearen jouwe
inkeld op Sinezen acht
as sy har skikke wolle
nei it fjoer fan ’t bruorrelân…
de broers dy’t skeine frouwen.
Gjin sekken kinne keare
’t stribjen nei de heechste macht
dat spûket yn de hollen
fan hearen yn it heitelân…
sy wurde dekorearre.
* Foto ‘Sinezen achter de barrikade
yn de Japansk-Sineeske oarloch’