mei 8, 2022
fan ûnbekend*
Wat docht in muorre foar it folk
dat siket om beskerming
op beheinde grûn, de lêste
fan in ûnbestimd bestean…
hoe lang dan noch te gean?
De muorre waard in finzenis
foar Joaden yn it getto
as besmette grûn yn Warschau,
amper plak om te bestean…
hoe lang dan noch te gean?
It wie de finzenis fan mear
as fjouwerhûnderttûzen
sûnder útsicht op ’e takomst
fan in trochrinnend bestean…
hoe lang dan noch te gean?
Wa’t oerbleau, kaam der libben út
foar ’t lot fan konsintraasje
fia gas en fjoer ta jiske,
gjin ferfolch fan it bestean,
gjin wei om noch te gean.
Wat dogge kelders foar it folk
dat siket om beskerming
yn it skeinde Marioepol?
Is der noch in wei te gean
of bliuwt gjin folk bestean?
Foto ‘Getto Warschau’
mei 7, 2022
fan ûnbekend*
Jeremia
De strjitten fan Jeruzalem,
sjoch dêr, nim alles yn dy op
en sykje ek de pleinen ôf
oft ek mar ien te finen
is om oaren rjocht te dwaan,
de stêd sil Ik dan it ferjaan.
Op strjitte hear Ik wol in stim:
‘Der wurdt in eed dien op de Hear,
sa wier Hy libbet, dy is falsk;
Jo wolle sjen wa’t earlik
is; hoewol’t Jo minsken slaan,
sy sille ’t rjocht gjin romte jaan.’
Ik seach op strjitte lytse lju
dy’t net it measte wisten fan
de rjochte wei, wat koene sy
der dan oan dwaan? Mar better
wist wol al dat folk dat grut
is, mar gjin ear hat foar myn wurd.
De liuw komt dêrom út it wâld
en út ’e steppe draaft de wolf,
de panter strúnt rûnom de stêd,
ferskuort wa’t dêrút komme,
sy gean yn tsjin ’t rjochte wurd,
wat foar it rjocht de ein betsjut.
* Foto ‘Wolf’
