februari 26, 2023
fan ûnbekend*
fan ûnbekend**
Hy moast de allergrutste wurde,
want Hindenburg wie fjildmaarskalk
en letter ek noch presidint,
foar Hitler koe it ek net lytser:
in reus foar hiel it nazi-folk.
Foar ’t loftskip wiene amper wurden:
’t foer as ‘Titanic of the sky’
fan Dútslân nei Amearika
en ek nei Rio de Janeiro,
it makke mannich lange reis.
It wetterstof joech ’t skip de draachkrêft
foar tsjin de hûndert lju oan board,
dy’t sweefden yn in loftpaleis,
dat transformearre ta in fakkel…
foar Hitler hat de reus net scored.
Hy waard troch ’t fjoer de allerlytste,
der bleau allinnich jiske oer
fan de ‘Titanic of the sky’
en ek fan fiifentritich minsken…
de twadde fal fan Babels toer.
* Foto ‘Hâlden en kearen mei de Hindenburg’
** Foto ‘De ûndergong fan de Hindenburg’
februari 24, 2023
fan ûnbekend*
Heech boppe seenivio de mar,
bewekke troch de hege bergen
yn ’t blaugriene Switserlân,
dêr’t minsken har ta wenjen setten
mei heech-leech as kar.
Om grûn te winnen foar de bou,
ferlegen se it hege wetter
fan de mar… sjedêr grien lân
om huzen, pleatsen del te setten,
oan de opdracht trou.
De opdracht kearde nei in iuw:
in daam ferhege doe it wetter
fan de mar… wei waard it lân,
de wetterkrêft ferlei de swetten…
enerzjy as driuw.
* Foto ‘Lungernsee’