april 10, 2023
fan ûnbekend*
fan ûnbekend**
Kin nachts kristal wol skitterje
lykas foar sier by ljochtskyndei?
It nazifolk, troch haat waansinnich,
seach it skitterjen by ’t joadske folk
en sloech it út ’e sponnings wei.
It wie de nacht fan brutsen glês,
dat deis sicht jûn hie op ’t bestean
fan Joaden, op ’e wrâld allinnich,
fan it lijen wiene sy de tolk,
foar oaren it fertsjinne lean.
Dat lean waard heger yn de nacht
fan haat dy’t troch de finsters briek
fan winkels en fan synagogen,
’t fjoer liet skitterje wat as kristal
op strjitte lei en bluodrich stiek.
Sa hat de iuwen troch it bloed
fan Joaden troch de strjitten rûn,
omdat sy troch har aard net doge
soene, oaren soargen foar har fal,
in skittering oan moardners bûn.
* Foto ‘Moarns nei de Kristalnacht’
** Foto ‘Diskriminaasje fan Joaden’
april 9, 2023
Syn bertestjer joech strieljend ljocht,
lykas de wizen witte lieten,
sa’nien waard doe wrâldferneamd
en soe syn ljocht grif skine litte,
mar it is de fraach wat hy hjoed docht.
Hy wie in Joad, gjin moadegril
woe hy de minsken hearre litte,
mar de wierheid, dy’t men neamt
te radikaal, dus lit mar sitte,
op Goed Freed briek men syn lea en wil.
Op Peaskemoarn, sa’t men doe sei,
kaam hy it grêf út, wer ta libben,
rekke dêrtroch wrâldferneamd,
syn ynfloed koe men amper mjitte,
’t is de fraach hoe sit it hjoed de dei?
De Joadestjer mist hjoed it ljocht
en alle grêven bliuwe sletten,
opstean docht men yn de wrâld
tsjin ûnrjocht lykas hy ek witte
liet en die, de fraach is wa’t dat docht.