april 27, 2023
fan ûnbekend*
fan Sjoerd de Vries**
Syn heit sit op it helmhout,
mar hy stiet as skipper oan it roer
om mei syn neisten troch de tiid te gean,
it hold oan board net oer.
Syn mem stiet op ’e lûken,
moast har rêde yn de lytse roef
om mei har neisten troch de tiid te gean,
it wurk oan board wie stûf.
Sjoerd hat oan board net wenne,
berne waard er yn in wente oan
de wâl om mei syn maten troch de tiid
te gean… as skipperssoan.
As keunstner liet er him al
kenne doe’t er noch op skoalle siet,
ferkocht oan maten wat er makke hie,
sa kaam er troch de tiid.
Syn âlders seach er foar him
as de skipper en de skippersfrou…
yn byld, mei him foar altyd troch de tiid,
hy bleau syn ôfkomst trou.
* Foto ‘Skûtsje De jonge Aaltje’
** Keunstwurk ‘Portret fan myn âlders’
april 26, 2023
fan ûnbekend*
Jeremia
Gods wurd berikte Jeremia
yn Egypte ek, it slavelân
dêr’t Juda’s foarfaars bodde hiene;
de Hear brocht doe it folk ta stân,
mar no leit Hy it flymjend del.
De foarfaars hiene goaden tsjinne,
har de jierren troch rûkoffers brocht,
sadat Gods grime oer har flamme;
fan jimme hat Hy ek syn nocht,
Jeruzalem kaam dêrom del.
Mar yn Egypte kin God jim ek
fine, lykas yn Jeruzalem,
jim komme om troch swurd en honger,
gjinien ûntkomt, gjin heit en mem,
it komt folslein op delslaan del.
Doe kamen manlju en har froulju
mei as antwurd dat it har neat die,
de keninginne fan de himel
ferearen sy, lykas it gie
by foarfaars, dêr kaam ’t wol op del.
Gods wurd gie tsjin dat fan de manlju,
hold úteinlik yn Egypte stân,
want farao soe ek omkomme
troch foarst Nebûkadnessars hân,
de macht fan ’t slavelân kaam del.
* Yllustraasje ‘Egyptyske keninginne’