Hy buorket op in spultsje by de beek,
is op dat plak ek mûnder
en hat twa hynders foar de wein,
op ’t mêd fan dûmny is er leek,
mar leaut as boer yn ’t wûnder.

De hjitte fan de dei brocht twivel mei:
it haailân of de mûne?
De loft hat him de wierheid sein:
de wjukken reitsje yn de draai
fol fjoer en dat is sûnde.

As tûke mûnder gie er oan de slach
en liet gjin wjuk mear draaie,
woe nei it lân noch foar de rein,
as tûke boer op ’t heljen wach,
dan hied er neat te kleien.

Mar as de hynders steane yn it span,
krijt hy in himelsk teken:
it wetter yn mei bist en wein
foar’t alles rekket yn de ban
fan ’t waar, sa leauwe leken.

* John Constable (1776-1837)
wie soan fan in rike mûnder
en skildere faak it idyllyske lânskip
fan syn bernejierren.
Skilderij ‘De heawein’

Sy hat se sjoen, de wizen
dêr’t de skilder har op wiisd hie:
‘Sjochst, Saskia, se binne yn berie,
har wiisheid is te priizgjen.’

Har Rembrandt koe it witte:
Paulus dy’t mei Petrus praat hie
oer hoe’t it yn syn eigen brieven stie,
dêr moast men it oan mjitte.

Sy koe der net mei sitte,
woe dat sy it him mar sein hie
dat sy folslein foar eigen wiisheid gie,
soks soe sy witte litte.

Har Rembrandt hat it murken,
klaaide har sa’t hy it sjoen hie
yn syn ferbylding, wie gau út ‘e rie
en hat mei ferve wurke.

Sy seach it oan as eale
dame, om’t sy ek wol wiis wie…
mei him foaral, mar dan yn stil berie,
fan top oant teil fereale.

* Rembrandt (1606-1669)
Skilderij ‘Petear fan wizen’
Skilderij ‘Laitsjende Saskia’