januari 28, 2017
fan ûnbekend*
In keizer kin net alles witte,
wol it tal, ’t seit alles oer myn macht,
dus rûn it út op tellen,
it folk joech op myn sizzen acht,
ik ha it reizgje litten.
Tafallich kaam ik ek te witten
dat ien by de telling berne waard
yn Betlehem, in jonkje
op datselde plak paraat,
men moat net ien ferjitte.
It hat net folle te betsjutten,
sa’t ik hearde, ’t barde yn in stâl,
syn mem is faam, sa’n frommes
telt amper mei, se docht it mâl,
dochs wurdt myn macht fergrutte.
* Byld ‘Keizer Augustus’ fn Prima Porta
januari 27, 2017
Ut it skûtsje-argyf 2004
It kin net breder foar in gaadlik plak,
in skipper wol it heechste komme
by de ûnderboei, der skerp omhinne;
wa’t leger sylt, leit dêr foar blak
en kin gjin hichte winne.
De reade mûtse is noch net te sjen,
men mist dêrûnder pompeblêden,
mar de B kin hjoed gjinien omhinne;
wa’t leger sylt, leit al ferlern…
dat skip moat fierder rinne.
Wa’t toarst hat, kriget ranja út ’e roef,
al ha de manlju ’t leafst in pilske
foar ’t eufoare foargefoel: it winnen;
it skip hâldt sa gjin koers of loef,
dêr moat it grif net hinne.
Mar rint it wol op ’t earste plakje út,
dan sjocht men reade pompeblêden,
ek de mûtse foar de felle sinne,
der folget fan de frou in tút
en ’t pilske foar it winnen.
