maart 4, 2019
It hie wol kind, in geit oerriden,
wylst er fan de hûnetongen friet,
syn achterpoaten brutsen,
in keuteltsje as lêste died,
hy hie neat mear te bieden.
In fytspaadskilder hie it wêze
kind mei ynspiraasje fan ’t gehiel,
troch hûnetongen lutsen,
dy’t glieden troch de geit syn kiel…
fan ’t keunstwurk ôf te lêzen.
Fan beide is alhiel gjin sprake,
want in swarte krie fleach skitend oer,
sa waard in part bedutsen
en is kreëarjen net in toer…
in frjemde gong fan saken.
maart 3, 2019
fan ûnbekend*
fan ûnbekend**
As beuker boude hy mei ’t spul
fan Fröbel, rjochte streken
stadichoan de hichte yn,
net heger kaam it as de mul,
it each seach der mei nocht op del…
syn beukerbou as teken.
Doe’t hy yn ’t libben healwei wie,
socht er in oare rûte
mei in frou dy’t hy wol koe,
foar him de moaiste foarmen hie,
mei beide bern fermoarde waard…
troch leechte die er boete.
Sa tusken grûn en leechte yn
fûn hy syn ynspiraasje,
boude tichtby de natoer,
dêr’t wetter falt en rûzet wyn,
as Fröbel-blokken, út ’e wel
fan doe… ferdivedaasje.
* Foto ‘Frank Lloyd Wright’
** Foto ‘Fila Fallingwater’