Tugen foar de wille

admin

oktober 15, 2016

Tugen foar de wille

Se drave yn de greide om
en komme by my by de hikke,
binne fôle foar de folle rom
by tugen en by springen
foar de baas nei ’t heechste rikke,
mar lûke yn de stringen?

Har maten ha de mar as mêd
fan swarte twirren oer it wetter
dêr’t fûl striden wurdt foar doarp of stêd
mei tugen heech foar ’t winnen
earst de priis, de wimpel letter,
mar bealgje yn de sinne?

Dêr lizze foar de swiere taak
de stielen hynders mei as stringen
kabels, hysjend, sakjend withoefaak
om effisjint te tillen
en it measte op te bringen,
mar tugen foar de wille?