Modelskiep

De moarntiid nûget freonlik út
om hiel de greide te ferkennen
op ’e siik nei pôlen gers
om de mage syn gerak te jaan,
it fjild biedt elk rom baan.

De kleur is dan net fan belang,
skiep hoege dêr net oan te wennen,
want it fjild is rom genôch,
elkenien fynt dêr syn eigen plak,
fielt him op syn gemak.

Sels as de romte him beheint
ta griene amer, is der plak foar
trije, sûnder slach of stjit
stiet it skiep de hiele dei model,
foar him is elk yn tel.