Oarloch swypket herten op
en lit it bloed troch helde-ieren jeie
foar de striid, lûd klinkt de rauwe rop:
‘Us naasje sil fiktoarje kraaie!’

Legers stampe oer de wei
nei frijheid, want dy wol it folk moarn priuwe,
foar Amearika in nije dei:
‘Jou acht en fjochtsje hjoed as liuwen!’

Sjoch de dea fan generaal
Montgomery yn ’t hjitst fan ’t rekke sjitten,
mar gjin noed, it lân tinkt nasjonaal:
‘It monumint sil ’t witte litte!’

Op it netflues brânt it byld
fan eigen hûs en folk yn ljochte lôge,
op ‘e hûd ha se it skroeien field,
yn ’t libben byld en plak meitôge.

* John Trumbull (1756-1843)
hat in searje skilderijen makke
oer de Unôfhinklikheidsoarloch
fan Amearika.
Skilderij ‘De dea fan Montgomery’

* Marc Chagall (1887-1985)
skildere de ferskrikkings
fan de oarloch yn (Wyt-)Ruslân.