Wy binne wend oan analyze,
raffels fan wat wie in kleed
dat kleur joech oan de ierde
en skakearrings by de fleet,
wy binne no yn ’t spul fertize.

Hy lit it rûzje fan de hichte
nei de delte: ’t fjild mei nôt
sjongt kleuren fan de sinne
yn it koar dat wize hâldt
oant see en wyldlân yn de lichte.

Sa hat er ’t lânskip lyrysk dichte,
oade oan de ikkerboer
dy’t kleur joech oan de ierde,
lofliet ek op mem natoer,
net ta raffelseam ferplichte.

* Jacob van Ruisdael (1629-1682)
bylde as lânskipsskilder
op lyryske wize syn leafde
foar de natoer út.