Ivich rêste nei de les

fan Rembrandt*

Kin Joaris wol foar ivich rêste
nei in libbenslang ferrin
fan op ’e strjitte foar de mage?
De hân griep faakris nei it mes,
dat syn gewisse bleau net skjin…
se seine, Joaris wie gjin bêsten.

Dêr leit er dan mei lege longen,
dy’t hurd wurken op ’e dei
dat hy in hannelsman berôve
en yn in flits griep nei it mes,
sadat syn lêste gong wie faai…
hy waard heech oan de galge hongen.

Syn mage leit al oeren iepen,
leger as it lêste skoft,
syn breinkas is yn oare hannen,
it mes snijt fierder foar de les,
sa wurdt er lizzend noch romroft,
mei fan de wittenskip lang sliepe.

* Rembrandt (1606-1669)
Skilderij ‘Anatomyske les fan Dr. Jan Deyman’