fan Viktor Vasnetsov*
In fûgel slacht de wjukken út
en riist fier boppe ’t minskeryk
dat eaget as wie ’t sletten,
mar de fûgelwrâld ûntslút
geheimen, driuwend op termyk.
Dêr strykt de fûgel Gamajoen
klapwjukkend op syn tûke del
en skuort de eagen iepen,
want de jefte is him jûn
te skôgjen hegerop en del.
Foar eagen komt him earst it swart
fan Sirin mei de holle del,
ferslein de beide wjukken:
‘Dizze fûgel hat gjin part
oan ’t libben, ik foarsis de hel!’
Dat is net wat it minskdom past,
dus krijt de fûgel Gamajoen
in ljochter byld foar eagen,
’t is de fûgel Alkonost:
‘De himel is de minske jûn!’
* Viktor Vasnetsov ( 1848-1926)
Skilderij ‘Gamajoen, de profetyske fûgel’
Skilderij ‘Sirin en Alkonost, fûgels fan fertriet en freugde’
|
