Archive for the Skûtsjesilen category

Wa  hâldt sa’n earste wedstriid net fan Grou?
It is in heale ieu tradysje
dat de searje dêr begjint;
hoewol’t de Tynje eaget nau,
wa wol it túch net op ‘e Pikmar hysje?

Wa hâldt dy earste wedstriid net fan Grou?
Al tolve kear wie Mink net earste,
hy giet lykwols troch foar bink;
hoewol’t de Tynje eaget nau,
in bink is breed en stribbet nei it measte.

Dêr sylt er tusken ’t Fean en Ljouwert yn
de Tynje út, it kin net better
en net breder… oft er wint,
wit inkeld noch de wikselwyn,
hiel leavjend Grou fernimt it efkes letter.

In Huitema, as wie ’t in boer,
de namme seit net alles,
mar sa kaam it wol by skippers oer.

Syn mem har namme, Foekema,
fertelde fan in Lucas,
elke skipper wist: dy sylde sa!

Wie Huitema mar Foekema,
sa gûnze it fan praatsjes:
‘Ja, dan woene wy dy Frans wol ha.’

Frans Huitema hie belle, want
hy woe wol skipper wurde:
‘Ja, ik bin in man nei silerstrant.’

It wie foar Drachten gjin probleem:
op ’t skip in boerenamme,
dat foar Frans kaam út in jongesdream.

By Earnewâld wie syn debút:
twa steigers waarden spuonnen
en De Jouwer kriich in hurde tút.

Wie Huitema mar Foekema,
dy namme is fan izer,
want dêr moat in skipper it fan ha.

* De nije skipper fan Drachten