Archive for the Skûtsjesilen category

Wat is in skûtsje sûnder seil?
It sylt allinnich foar de wyn
op ’t fokje mei de loete;
’t hat de gong der net mear yn
en ’t resultaat is ûnder peil.

Noch foar de start trof ’t needlot Grou,
in klap oer stjoerboard en ’t wie dien,
in stikken seil as boete;
dêrnei trof it lot noch ien,
in klap en Snits wie der ek ôf.

De Lemmer mei it lytse doek
joech oan de oaren klap nei klap
en waard as winner groete;
om’t it seil wie wat te krap,
kaam ’t twadde doek boppe de broek.

It wie te sjen, al foar de start
begûn de striid mei wyn en weach,
de skipper socht om de posysje
dêr’t it skûtsje ’t heechst út fart
en ’t seil falt fol ambysje.

Dêr’t fjirtjin fjochtsje om de ear,
befart mar ien it heechste plak,
mar ek dêrachter waard ferwoede
striden, sjoch de liuw en earn
fûl yn de achterhoede.

Dat Drachten yn de midden foer
en mei de D net ûnder gie,
dat wie in dûbelstriid foar wûnder;
lykwols foar wie ’t fjochtsjen oer,
want Huzum rekke ûnder.