Archive for the Skûtsjesilen category

Se binne troch de finish
mei de wetterpoarte yn it seil,
de manlju rjocht oerein,
’t is wis dat Snits de bêste is,
in optein wurd, lykwols net steil.

Berikt wurdt nea de finish
fan it hiele spul is maksimaal,
it komt net ta de ein,
’t is wis dat wurk it bêste is,
sa spriek de skipper* kleare taal.

De liuw kaam troch de finish,
net as skûtsjekampioen, wol mei
’t ûnthjit foar takom jier,
’t is wis dat Ljouwert der dan is,
in twadde plak wiist dêr al nei.

* Douwe Visser

Se sile mei de hals omheech
en klapperjende seil en fok,
want by de start is ’t altyd drok,
posysje kieze wurdt hjoed dreech.

De Lemmer sjit fûl út ‘e start,
foar ’t eigen folk it fjoer deryn,
mar Ljouwert leit min oan de wyn,
de turbo brânt de pipe swart.

Foar Jelle* wurdt de striid krityk,
it Lemster folk betsjut gefaar,
net earst, dan is er de sigaar,
mar sjoch, hy rekkenet him al ryk.

Foar Ulbe** giet it paad omheech
mei ’t linich klimmen yn de mêst,
want losse kloaten moatte fêst,
sa krijt de liuw fan him in feech.

* Jelle Reyenga
** Ulbe Zwaga