Archive for the Religy category

Hee as finster op it wêzen,
blau fan trochsicht op ‘e ivichheid
dêr’t grien it lân fan hope leit,
fiif wurden om mystyk te lêzen.

Hee as ramt fan griene holle,
tinkend, sprekkend neffens wize rie,
de hân trochtaastend mei de die,
de ienheid om ’t bestean te follen.

Hee, trochskinend as de siele
dêr’t de ienheid blaast it klear kristal,
fiif stjerren swevend yn ’t hielal
fan binnen om mystyk te fielen.

Sjoch ek: Religy Alef, Beet, Gimel, Dalet

Dalet, doar mei fjouwer hoeken
alle kanten fan de skepping út,
as tagong nei de geast
dy’t strieljend fan Jahweh ûntslút
sjaloom de ierde yn it rûn.

Iepen doar foar de seizoenen,
rinnend op it ritme fan it jier,
foar elk in eigen geast,
dy’t oarder jout oan plant en dier
en minsken meinimt yn it rûn.

Iepen doar foar eleminten,
ierde, wetter en ek lucht en fjoer,
ferskaat mar yn de geast
fan groei fan plant en dier, as boer
skrept noch de minske op dy grûn.

Iepen doar foar fjouwer memmem
dy’t as earsten joegen bern it ljocht,
fertrouwend dat de geast
Jahwehs sjaloom al strieljend brocht
op oan de heit ûnthjitten grûn.

Sjoch ek: Religy Alef, Beet, Gimel