Archive for the Religy category

Berch Sinai,
healwei Egypte en ’t beloofde lân,
gjin palmen yn de stienwoestyn,
mar wol in hân.

Berch Sinai,
de wei fan foet nei top, in ljochte wolk
derboppe mei in hân deryn
foar hiel it folk.

Berch Sinai
dy’t Mozes, lieder fan it folk, beklom,
foar eagen mear as sinneskyn,
gjin sicht rûnom.

Dêr wie Jahweh
en út ‘e hege wolk wei kaam de hân,
syn palm joech inkeld sicht oant yn
’t beloofde lân.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet, Joed

Joed, de earste letter fan Jahweh,
de hân rjocht út ‘e hichte wei
om nei de ierde út te stekken;
twa hannen nimme tsien kear mei
in fingerwizing foar it libbenspaad.

Noch twa letters binne fan Jahweh:
hee, ’t finster op ‘e ivichheid
om mei it each omheech te rikken;
en wav dy’t de ferbining leit,
in minskehân omheech, de fingers spraat.

Komme sa de hannen byinoar,
dan ljochtet yn it blau it wyt
om yn jûchhei lûd út te brekken;
de ierde sûnder wryt of slyt
komt sa as ’t hôf fan Eden op ‘e kaart.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet