Archive for the Religy category

Samech, sletten letter,
romte inkeld fan Jahweh,
sa ûntagonklik as in stjer,
fier boppe goed en better.

Strieljend wyt dat brekke
kin troch rûnten en rûnom
syn ljocht ferspriedt en lûd: ‘Ik kom
om hannen út te stekken.’

Trijehoek nei boppen
wizend, heinend ’t strieljend wyt
dat sydlings nei de ierde glydt,
syn stipe sil fier roppe.

Under mei it woedzje
as de weagen fan de see,
de beide hannen binne ree:
Jahweh sil dy behoedzje.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet, Joed, Kaf, Lamed, Mem, Noen

Jordaan, rivier om troch te gean
as fisk yn streamend wetter
dat ornearre is foar syn bestean,
de lucht as azem yn dat elemint
sa fier as de rivier nei ’t suden rint.

Mei Jozua rûn ’t folk dertroch
oer ’t paad foar stilsteand wetter;
Jakobs tolve soannen stiene noch
te wachtsjen oant Gods feint it teken joech,
de holle heech, de fuotten trochgeand droech.

De sinne wiisde oer it lân
it paad nei de belofte,
wylst joech Jozua syn rjochterhân
it teken fan de fisk yn ’t elemint
sa fier as de rivier nei ’t suden rint.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet, Joed, Kaf, Lamed, Mem