Archive for the Religy category

De mûle spriek de tinzen út,
in stream salang’t de skepping duorre,
de minske kaam ta einbeslút
en spriek mei moed en muorre.

It moed dêr giet de die fanút
dy’t mei de hoop en leafde fuorret,
de muorre, dy’t de tagong slút,
riist op salang’t it duorret.

Want as Jahweh fan leafde sprekt,
dan giet de skepping op herhelling,
sadat de muorre iepenbrekt,
de do fljocht oer de delling.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet, Joed, Kaf, Lamed, Mem, Noen, Samech, Ajin

Ajin, twa eagen om te sjen
de djipte en de hichte,
wat wûn is en ferlern,
de frijheid en de plichten,
wat west hat en wat komt,
de wolken en de weagen,
wat rjocht is en wat krom,
dat alles is foar eagen.

Mar sjoch, de glâns fan twa wurdt sân,
sân dagen yn de wike,
’t ûntstean fan see en lân,
de himel waard ferrike
mei fûgels nei Gods sein,
sân dowen yn de weagen
fan ien, de heilsfontein,
dat alles stiet foar eagen.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet, Joed, Kaf, Lamed, Mem, Noen, Samech