maart 22, 2019
fan Rembrandt*
Fan keninklik komôf
yn’t lân fan de Bataven,
hie hy neat mei de Romein,
dy’t nei it noarden kommen wie,
dat naam Civilis him kwea-ôf.
Himsels trof fûl it kwea
fan finzenskip, de frijheid
waard him mei syn broer ûntsein;
beskuldige fan rebelly
kriich dy it fonnis fan de dea.
De deastraf rôp om wraak
nei’t eed-miel yn it hillich
wâld: de sege waard foarsein;
Bataaf, Germaan, Kaninefaat
en Galliër, elk kriich in taak.
De wraak teach driftich mei
it leger fan Civilis,
dat de fijân waard ferslein;
de sege hat ta lânwinst laat,
mar letter kaam de ommeswaai.
De oermacht wie te grut,
de ein kaam foar Civilis
by de Ryn, doe waard ferlein
de grins in ein nei ’t noarden ta,
it swurd ferlear it fan it wurd.
* Rembrandt (1606-1669)
Skilderij ‘De eed fan de Bataven’
maart 15, 2019
fan ûnbekend*
fan Juan Antonio Ribera**
Cincinnatus, dûbel hear,
earst as patrisiër,
mar boppe-al as moedich man
fan rjocht en reden,
as diktator kriich er twa kear ear.
Cincinnatus hoegde net
sa nedich op ’e troan,
mar oarder hâlde hold er fan,
sa brocht er frede,
as diktator hat er Rome ret.
Tuskentroch wie hy ek boer
op grûn oan de rivier,
al ploegjend mei in rjochte streek;
alhiel tefreden
seach er nei it wurk de fuorgen oer.
Frege foar de twadde kear
hat hy as man fan ’t fjild
’t folk sêde yn de hongersneed;
mei rjocht en sede
kriich er foar de stêd it wer ris klear.
* Byld ‘Cincinnatus’
** Juan Antonio Ribera (1779-1860)
Skilderij ‘Cincinnatus ferruilet de ploech foar de wet’