december 6, 2019
fan Odilon Redon*
Berne waard sy tusken weagen
fan de see, in widze wyt fan skom,
sy swom al ier de brâning oer
mei gers en blom foar eagen.
Galateia, kreas fan holle
oan de fuotten ta, woe net werom,
lei yn it kleare ljocht foaroer,
sy skonk ien each tefolle.
Polyphemos waard fereale,
mei in knypeach wonk er: ‘Leave kom,
dan springe wy de heuvels oer
mei trije eagen, deale!’
Hoeder Akis, skerp fan eagen,
plôke foar de faam in reade blom
en joech dy mei in knypeach oer,
hy hat it derop weage.
Polyphemos, read fan grime,
sloech de hoeder mei in rotsblok krom,
foar Akis wie it noch net oer,
as beekgod hat er ’t rime.
* Odilon Redon (1840-1916)
Skilderij ‘De sykloop’
november 29, 2019
fan Rembrandt*
Zephyros, wat hasto mei Cloris dien,
de nimf op waast fereale wiest;
do sietst har achternei
en krigest har te pakken…
dat wie net it iennichst watsto diest.
Zephyros, ’t hert fan dy wie net fan stien,
waardst fan har dwaan en litten waarm,
mar woest in ommeswaai,
har heger transformearje
ta goadinne Flora, net mear faam.
Goadinne Flora, as in blom yn ’t grien,
woe Hera helpe oan in soan,
mar sûnder Zeus syn sie;
’t kaam del op it formearjen
fan god Ares, wat foldie har skoan.
* Rembrandt (1606-1669)
Skilderij ‘Flora’