januari 10, 2020
fan Caravaggio*
fan Benvenuto Cellini**
Sjedêr de goaden fan de see,
wa kinne út har berne wurde?
Trije dochters, gjin gewoane
bern, se hawwe neat fan frou of fee,
it binne de Gorgoanen.
As slangen krollet har it hier,
se gripe mei de brûnzen hannen,
fleane fluch op gouden wjukken,
sjogge skerp, gjinien is mear yn ’t spier,
se litte oaren krukke.
Medousa hie gjin lang bestean,
har beide susters libje ivich,
dat dy iene, yn ferwachting
troch Poseidon, soe de dea yngean,
fermoarde sûnder achting.
Fermoarde waard sy troch Perseus,
dy sloech har ôf de slangeholle,
út ’e wûne waarden berne
’t wjukkehynder en in rûge reus,
de mem koe har net kenne.
* Caravaggio (1571-1610)
Skilderij ‘Kop fan Medousa’
** Benvenuto Cellini (1500-1571)
Byld ‘Perseus mei de holle fan Medousa’
december 27, 2019
fan Filippo Tagliolini*
Ouranos’ bloed wie harren mem,
dêr’t sy út berne waarden,
meunsters foar gjin goaden bang,
noch minder foar gefaren,
har slangeskonk hie net in rem.
Gigantysk wiene harren lea
om bergen te fersetten,
rotsen fuort te slingerjen,
ferlizzend Zeus syn swetten,
sy hearsken oer it Grykske gea.
Mar Zeus hie ’t net op harren stean:
Giganten tsjin de goaden
gie tsjin alle regels yn,
gjin sprake fan akkoarden,
it moast op striid om macht oangean.
It waard in striid om it bestean
fan goaden of Giganten,
sa’n gefjocht hie der nea west;
Zeus wist op ’t lêst fan wanten,
hat meunsters gjin akkoarden bean.
De slangekoppen fan Typhon
begroef Zeus yn mem Ierde.
* Filippo Tagliolini (1745-1809)
Byld ‘De fal fan de Giganten’