januari 24, 2020
fan William Etty*
Elk makket fan in barren syn ferhaal
op grûn fan it gefoel,
dat nei it feit de haadrol spilet,
’t giet mei oare spilers oan de haal.
Kandaules wie fan Lydië de foarst,
hie oer syn frou ’t gefoel
dat sy de moaiste wie op ierde,
dêrom siet hy op ’e troan mei ’t boarst…
… foarút en tocht er oer in wis bewiis:
hy stjoerde Gyges út
op ûndersyk, hy moast har neaken
sjen, wat wie de keningin in griis.
Sy sette Gyges foar in drege kar:
‘It wurdt dyn eigen dea
of do fermoardest hjoed Kandaules,
troust mei my en bist as foarst oan bar.’
It rûn op trouwen en op kening út,
want wa kiest foar de dea?
Der wie gjin kar foar foarst Kandaules:
Gyges naam in keninklik beslút.
Lit Herodotos mar mei syn ferhaal
it feit fertelle fan
de wrede dea fan foarst Kandaules,
oaren dogge dat op eigen skaal.
* William Etty (1787-1849)
Skilderij ‘Gyges sjocht de keningin’
januari 17, 2020
fan Eugène Guillaume*
Wat kinne lytse boeren
mei har skeamel hoekje grûn
begjinne tsjin de hege hearen
mei it steile wurd yn de senaat?
Oan ien hân is de boer al bûn,
hy kin net op tsjin stedswiis praat.
Twa broers beskôgen dat as
ûnrjocht; earst Tiberius,
doe Gaius woe de hearen keare
om de bûne boeren rjocht te dwaan:
in earlike ferdieling, dus
sy woene har mear opbringst jaan.
’t Wie tsjin de wil fan hearen
dy’t fertrouden op har wurd
en dêrmei wûnen landerijen
oer de boer syn rêch, fan ’t wurkjen krom;
sy brûkten ek geweld mei ’t swurd,
sa kaam Tiberius earst om.
Broer Gaius liet him deadzje
troch in slaaf, hy koe it folk
net út ’e rike macht befrije;
withoefolle liken dreauwen yn
de Tiber, draaiden yn in kolk,
it rjocht ferfleach sa op ’e wyn.
* Eugène Guillaume
Byld ‘Tiberius en Gaius’