oktober 30, 2020
fan Athanadoros, Hagesandros en Polydoros*
Yn Troje wie hy pryster,
Laokoön, fan twa jonges heit,
hy hie it net op ’t houten hynder stean
en liet dat de Trojanen witte,
stiek troch ’t hout… syn dea wie tryster.
It hynder fan de Griken
wie in list, foar Troje wie ’t in feit
dat yn de stêd de fijân kaam te stean,
wat Laokoön earder witte
liet, dat syn gelyk die bliken.
Wat jout it om gelyk te
krijen as twa slangen knipe ta,
sadat de heit en syn twa soannen nei
de siken gapje, dy’t it sitte
litte, stjerre sûnder sykte.
Wat wie de rol fan goaden
by de ramp fan Troje en de dea
fan Laokoön en syn soannen, mei
dy fraach bliuwt elke tinker sitten…
hawwe sy fan ’t minskdom holden?
* Athanadoros, Hagesandros en Polydoros
Byldegroep ‘Laokoön en syn soannen’
oktober 23, 2020
fan ûnbekend*
As berntsje yn de bergen lein,
omdat syn heit him dea ha woe
fanwege frjemde dreamen,
kaam er libben út ’e need…
in hoeder naam him op ’e noed.
Dêrmei wie lang net alles sein,
syn heit sloech acht op it komplot
en strafte strang de dieder,
dy’t fan wredens earst gjin weet
hie: ’t eigen soantsje smakke goed.
Mar Kyros kaam yn it paleis,
syn heit naam him as soan wer oan,
want sa woe ek de hoeder,
dy’t foar him in heit west hie,
de bergen joegen him de moed…
… om as in fjildhear ûnderweis
te wêzen, letter as in foarst
de folken te regearjen,
altyd klear mei rie en die,
hy hie de ierde op syn noed.
* Yllustraasje ‘It âlde Perzië’
