november 13, 2020
fan ûnbekend*
Sjoch nei Leonidas,
dy’t kening wie fan Sparta,
oant it lêst ta hold er moed
al stridend tsjin de Perzen
by Thermopylai, de smelle pas.
Hy loek him net werom
op Peloponessos, want
isolaasje stie him tsjin,
fan Xerxes woed er winne,
dan de grins oer, want de wrâld wie rom.
Sjoch ek nei Xerxes, troch
ferrie koe dy it winne
fan Leonidas, syn moed
soe net stânhâlde mei dy
fan ’t elitekorps… wa libbe noch?
Mei trijehûndert hie
Leonidas fûl striden
tsjin in oermacht, wat hie sin:
syn moed waard as in foarbyld
foar de Griken: kom sa ta de die.
* Byld ‘Leonidas’
november 6, 2020
fan Jean-Baptiste Marie Pierre*
Leda koe it wier net witte
dat de swan syn lange hals
har kant útstekke soe
om har lichem te berikken…
hy blaasde, wat klonk falsk.
Leda koe net sitten bliuwe,
want de snaffel treau har del,
wat sy perfoarst net woe,
mar de swan woe mear berikke:
ien wurde, dus in stel.
Leda lei dêrnei de aaien,
’t famke kaam út ien dêrfan
mei Zeus as wiere heit,
dat Helena soe berikke
de skientme fan in swan.
* Jean-Baptiste Marie Pierre (1714-1789)
Skilderij ‘Leda en de swan’