mei 7, 2021
fan Peter Paul Rubens*
It ynsicht kriich hy al yn ’t foar,
hy wist sa wat der barre soe,
syn krêft lei yn it witten
fan wat wichtich wie, net mei geweld
de oaren stikke litte.
In bûnsmaat wied er fan god Zeus,
dy’t hearske oer it goadedom
en focht tsjin de Titanen,
letter naam er ôfstân fan ’t geweld,
seach hoe’t de minsken kamen…
… mei offerdieren nei god Zeus,
dy’t neat fan ’t minskdom hawwe moast
en delseach op ’e ierde,
mar Prometheus waard harren held
fanwege goede dieden.
Zeus wie jaloersk en waard poerlilk,
hy bûn Prometheus rotsfêst,
doe koe in earn him pikke;
Herakles hat alle kearen teld,
liet him as maat net stikke.
* Peter Paul Rubens (1577-1640)
Skilderij ‘Prometheus yn de boeien’
april 30, 2021
fan Peter Paul Rubens*
Procne en Philomela,
dy susters bleauwen elkoar trou,
sy flechten foar Tereus
as sweltsje en as gealtsje,
want sy kamen yn it nau.
Procne, troud mei held Tereus,
sy krigen Itys as de soan
dy’t foar syn heit ta miel waard,
wat hy net yn de gaten
hie, foar him wie it bedoarn.
Mem en tante namen wraak,
om’t hy Philomela tenei
kaam, sa waard Itys iten;
om’t sy Tereus haten,
naam de dea it soantsje wei.
Procne en Philomela,
dy susters giene op ’e flecht
as sweltsje en as gealtsje;
dy fûgels koene sjonge…
wat klonk falsk en wat wie echt?
* Peter Paul Rubens (1577-1640)
Skilderij ‘Tereus wurdt konfrontearre
mei de holle fan soan Itys’
