juni 18, 2021
fan André Corneille Lens*
Regulus, Romein fan striid en wurd,
fan winne en ferlieze,
ek syn libben yn in spikertonne;
yn Kartago kaam er yn de sel,
dêr koed er foar it libben kieze.
Stridend tsjin Kartago wûn er slach
nei slach, mar net de frede,
op it lêst soe hy de striid ferlieze,
ek syn frijheid yn Kartago’s sel,
dêr koed er kieze mei twa eden.
Mei eed ien ûnthiet er dat yn plak
fan him in tal Romeinen
kaam telâne yn Kartago’s sellen;
slagge ’t net, dan gong er sels werom
en seach er nea wer Romes pleinen.
Oan eed twa ferbûn er trou de died:
hy waard de sel yn smiten,
kaam telâne yn in spikertonne;
Regulus, Romein fan striid en wurd,
koe nimmen syn ferlies ferwite.
* André Corneille Lens (1739-1822)
Skilderij ‘Regulus giet werom nei Kartago’
juni 11, 2021
fan Nicolas Poussin*
As lytse poppe, op ’e flecht,
waard Pyrrhos brocht oer de rivier
nei kening Glaukias, dy’t him opbrocht,
syn aspiraasjes rikten fier.
As kening foel hy altyd oan
en harke net nei wize rie
fan Kineas, dy’t him de frede brocht,
syn aspiraasjes rikten fier.
Hy brocht sels oaljefanten yn
de striid, wat nimmen earder die,
wat de Romeinen yn benearing brocht,
syn aspiraasjes rikten fier.
De sege wie meastal foar him,
mar mei ferlies fan wat er hie
oan krêft, wol wûn er, mar net wat er tocht:
in ryk fier oer de grinsrivier.
* Nicolas Poussin (1594-1665)
Skilderij ‘De jonge Pyrrhos wurdt rêden’