juni 17, 2024
Hy hat nochal ferbylding
op ’e hichte fan it plak
om alles oer te sjen,
sa is er fan betinken
dat him neat ûntgiet,
hy macht hat oer de wrâld
dy’t yngiet op syn winken
fan ‘jou oer wat my befalt’,
wat grau is, lit him kâld.
Hy is it byld dat oanjout
hoe’t men op ’e wrâld fier rikt
om nei it plak te sjen
dêr’t swart it blanke blinke
lit, want neat ûntgiet
de wrâld fan wat men jout
oan djipgeand suver tinken
oer wat elkenien befalt
dy’t op ’e oar fertrout.
juni 16, 2024
fan ûnbekend*
fan Piet Mondriaan’**
Net daliks is men wrâldferneamd,
der is in lange wei te gean
fan iepenstean nei nije styl,
dy’t streekrjocht oansprekt mei de kleuren
fan primêr út eigen siel.
Piet Mondriaan waard net beneamd
as skilder mei in atelier,
syn wei rûn by mear banen lâns:
fan lesjaan oant ferplicht ûntwerpe,
sekundêr griep hy syn kâns.
Syn skilderjen nei de natoer
joech him de kâns foar syn bestean,
mar net de ynspiraasje foar
streekrjocht te gean foar kleare kleuren,
sa feroare hy fan kar.
Hy joech him oan de stylkar oer
fan rjochte streken en primêr
de kleuren, nea hie yn de wrâld
it folk op doek foar eagen krigen
foarmen, kleuren mannichfâld.
* Foto ‘Piet Mondriaan’
** Skilderij ‘Komposysje yn read’
