november 6, 2022
fan ûnbekend*
fan ûnbekend**
Wat driuwt de minske nei rekords,
wat hat hy derfoar oer
om hurder as in oar te jeien?
Fan binnen jaget him wat op,
mar wat, dêr is gjin namme foar,
’t sil om syn eigen namme draaie.
Hy draait him om en wol wat oars,
it libben hat gjin doer
om syn rekord lang út te stellen,
dus Malcolm Campbell, set him op,
de ‘Blauwe Fûgel’ is derfoar
om krekt te passen op ’e tellen.
It leit him soms mar oan ien tel,
te let… ’t rûn út ’e kloer
foar ’t jonkje dat op tiid net wike
koe foar it tsjil, ’t fleach by him op…
de ‘Blauwe Fûgel’ wie net foar
in flecht dy’t delkaam op wa’t libbet.
Men hat gjin libben derfoar oer
yn ’t foar, mar is it bard,
dan wurdt fiifhûndert yn de oere
in nij rekord, men libbet op.
* Foto ‘Malcolm Campbell’
** Foto ‘Bluebird‘
november 5, 2022
fan James Tissot*
Jeremia
As profeet fan God, de wiere,
fiel ik my alhiel ferslein
en trilje fûl oer al myn lea
as hie ’k tefolle dronken
fan de wyn dy’t nei de holle set,
Gods wurden ha my alles sein.
Treurich leit it lân derhinne
mei troubrekkers as de flok
dat net in bist mear weidzje kin;
útdrûge binne boarnen
yn oazen, oars sa grien fan hoop,
no grau, te leech foar mar ien slok.
Sels profeten binne brekkers
fan de trou, oant yn myn hûs
moat ik ferneare harren kwea;
dus komme sy te fallen,
want it paad is ’t falske folk te glêd,
de fal bringt harren yn de sûs.
* James Tissot (1836-1902)
Skilderij ‘Jeremia’