Posted by admin

Hy kaam út it bekende laach
fan Brouwers, skippers wiid ferneamd,
betocht op elke romme flaach,
dus waard er troch Philips beneamd.

Syn tinken brocht gjin resultaat,
hy swalke jierren achteroan,
de Heale Moanne kaam yn ’t skaad
fan mannich seil, foel út ‘e toan.

In serenade komt te let,
dan is de wedstriid al foarby,
de moanne is de sinne net,
dêr moat in sterke gloeipit by.

Dus gie er gloeiend út ‘e start
en kamen stjerren yn it skaad,
dat oaren skrepten harren swart
fan argewaasje út ‘e naad.

Sa sette Teake wike ien
yn ’t felle ljocht fan ’t earste plak,
de twadde is wat minder gien,
mar tredde waard er mei gemak.

De wite tugen blinkend fel,
de swarte dekken skroeiend hjit,
de skippershollen wiet fan ’t swit,
gjin ko jout him noch noflik del.

Wannear’t sels Klaas* it sitte lit
fanwege ’t ritme fan syn hert,
dan wit De Feanhoop wol hoe let
it is en dat de starter mjit.

De skûtsjes farre hjoed op tiid
fan groanometers fan begjin
oant ein, ’t is lykwols min nei ’t sin
fan ’t folk dat mist de wiere striid.

De Snitser Pan bliuwt groanysk earst
en slacht akút de Jouster fier
werom, mar as de flagge bier
belooft, dan wurdt elk plak in feest.

* Klaas van der Meulen