admin

oktober 4, 2016

Oarloch

Wa soe de kleur fan ’t beamterrein
net prevalearje litte
boppe ’t bûnt geweld fan wei en wein
dêr’t riders mear fan witte?

Se ride moarns de hichte op,
parkeare tusken streken,
auto-eksersysje sûnder rop,
mar wol mei taal en teken.

De taal fan fol is net genôch,
in teken dat ferklearret
oarloch oan it beamterrein dat troch
in strategy skansearret.

De strategy yn unifoarm:
oranje moat nei boppen,
motorseagje, gûle as in stoarm,
de earm leit yn de groppe.

Nij asfalt foar de kleur yn ’t plak,
wy prevalearje weinen,
bûnte glâns fan lak, elk yn syn fak,
dy oarder is in seine.

oktober 4, 2016

Lyrysk Deiboek

As de dize bringt de tiding
fan ’t ferrinnen fan ’t seizoen,
wurdt de boat oan ’t keatting bûn,
nimt de leechte lang de lieding.

Winterlang yn sliep fersonken,
dreamend alle kanten út
fan de simmersinnetút
en werom fan wetter dronken.

Oan de oare kant fan ’t trekpaad
stiet yn ’t skier de hôfkapel,
stil beskôgjend wa’t yn tel
wie en no net langer meipraat.

Stjerrend wier yn sliep fersonken,
dreamleas wachtsjend yn it neat
op ‘e tiid fan himelfeart,
yn it libben al beklonken.