Posted by admin

Lit ús ’t net oer De Lemmer ha,
dat skûtsje rûn as ’t spoar,
dêr kaam gjin inkeld skip oan ta,
de Lemsters leine einen foar.

Lit ús ’t wol oer de wolken ha,
dy’t jagen oer de mar,
dêr kaam gjin inkeld skip oan ta,
it gie sels stoeren soms te bar.

Lit ús ’t net oer de Zwaga’s ha,
dy krigen in protest,
sy sylden op ‘e haven ta,
de wedstriid hie foar harren west.

Lit ús ’t wol oer de Feansters ha,
as tredde oer de streek,
sy sylden op ‘e stiennen ta:
‘Dus noch in rûntsje,’ sei de leek.

It komt der faak op oan by roer en skoat,
de rêch tsjin ’t hout, de hân ta fûst,
mar op de Fluezen hâldt de wyn him koest,
dochs binne alle spieren spand oan board.

De brune fan De Jouwer lûkt it net,
lit achter mar in sunich spoar,
hoewol’t se hâlde, keare, mar dat ’s foar,
de boom en loete binne heger set.

By Boalsert achterop is ’t jongfolk baas,
want Eldert* hat in hernia
en kin de rêch net tsjin it helmhout ha,
de soannen wurde tredde… topgeraas!

* Eldert Meeter, heit fan Siete (roer)
en Pieter (skoat)