Posted by admin

Hy flechte foar it kriichsgeweld
en wist dêr spilet grif de dea
de haadrol op it slachtoaniel,
want nei de hjitte hearsket kjeld,
dy’t waret oer ’t bestjurre rea.

Mar doe’t er fûn de feilichheid
fan frede, hearske wer de dea,
diskear troch sykte, goalera,
de slach wie wreed, hy brocht as heit
twa bern nei ’t grêf, fergeat dat nea.

Hy brocht de kwast nei syn palet,
it linkerear nei strykmuzyk
en wist dêr spilet grif de dea;
op ’t doek hat er de klanken set,
syn keunst oerlibbe ’t deaderyk.

En nei syn dea klonk wer muzyk,
fan Mahlers fjirde symfony,
dêr’t Böcklins kleurpalet yn klonk,
doe draaide yn it grêf syn lyk:
reaksje op ‘e melody.

* Arnold Böcklin (1827-1901)
waard nei syn dea beskôge
as de belangrykste Dútske skilder
yn syn tiid.
Skilderij ‘Selsportret mei de dea’

Dan klinkt de seage, sjoch de beam
falt foar de opbou fan de naasje:
yn feriene steat de griene dream,
wurk foar ferdivedaasje.

Sy hawwe leard foar ’t boartersskoft
en stekke út de beide hannen,
drave, hâlde fêst, yn sleep en kloft,
no jonges, letter mannen.

Al pubers, mei de sloep fan heit,
oan board de wylgetienen fûken,
stilte dy’t in goede fangst foarseit,
earst fiere, letter lûke.

Feriene krêft yn dizze steat
sil pubers grif folwoeksen meitsje,
lykwols as de man it spul ferleart,
sil hy út lykwicht reitsje.

* Winslow Homer (1836-1910),
in Amerikaanske keunstner,
skildere bern as symboal
fan de earste perioade
fan de Feriene Steaten.