juli 16, 2018
De hoanne kraaide al betiid,
hoewol’t de klokken lang al swijden,
omdat fierwei ’t measte folk
de romte foar de preekstoel mijde.
’t Wie sûnde foar it hege dak
dat net mear foar de minsken tsjinne,
dêrom wennet der no folk
mei wijde romte om har hinne.
De himel seach genedich del,
mar wolken flokten rûch mei wetter,
dat it dak net keare koe,
de duvel spile doe foar ketter…
… dy’t skieding bringt yn dizze tiid,
dus kraaide lûd de âlde hoanne,
dy’t gjin lijen hawwe woe,
want elk drinkt út deselde boarne.
Doe tilde heech de sterke earm
twa ingels boppe tûzen pannen,
dy’t bestrieden satans skea
op heech nivo mei wijde hannen.
juli 15, 2018
fan ûnbekend*
fan ûnbekend**
Hy wie gjin Afrikaan,
mar hat in eigen stimpel set
op paskes fol diskriminaasje;
fûl fulminearjend tsjin de wet
joech hy de rjochtsgong faasje.
Hy wie fan heech komôf
yn Yndia, mar yn de wrâld
brocht hy lykweardigens nei foaren;
geweldleas focht er foar ’t behâld
fan eigen folk én oaren.
Syn kleur wie oars as yn
Súd-Afrika joech oan de wet;
hoewol’t er heechhold rjocht en graasje,
waard Gandhi út ’e stoomtrein set…
in wolk fan argewaasje.
Syn stim spriek fan ferset
tsjin fingerôfdruk op ’e kaart,
foar Yndiërs dé registraasje;
sy hiene by syn hâlding baat,
in foarm fan demonstraasje.
* Foto ‘Mahatma Gandhi’
** Stânbyld ‘Mahatma Gandhi’
yn Jehannesburch