juni 7, 2019
fan John William Waterhouse*
Danaos en broer Aigyptos
hiene beide fyftich bern,
Danaos allinnich dochters,
inkeld soannen soe Aigyptos sjen.
Danaos liet daliks witte:
‘Al myn dochters bliuwe frij
fan in houlik mei dyn soannen,
’t brulloftsfeest giet oan har noas foarby.’
Mar de soannen fan Aigyptos
holden as de storein oan,
dat de houliks waarden sletten,
neef mei nicht, in dochter mei in soan.
Danaos liet dat net sitte,
joech syn dochters elk in dolk;
stutsen waarden harren mannen
op Lynkeus nei, dy liet syn folk…
… witte dat de Danaïden
stjerre soene, ek massaal,
neffens fyftich wrekers wetten
spriek er as syn omke ek dy taal.
Yn de ûnderwrâld trochskeppe
sûnder dat it fet fol waard,
diene fyftich drokke dochters,
’t wie de straf foar harren fûle haat.
* John William Waterhouse (1849-1917)
Skilderij ‘De Danaïden’
juni 6, 2019
fan Aert van der Neer*
It treft net inkeld earme skiters,
dy’t mei lijen har troch ’t libben slaan,
elk kriget yn ’t bestean syn diel
en rint troch ’t duvelsk lot gefaar,
ek hege miters.
Gjinien wist fan de earste flammen
bûten ’t hurdfjoer en ’t gewoane dwaan,
ynienen lôge ’t yn ’t kastiel
en fierder troch it hege dak,
elk stie ferlamme.
Mynhear pastoar begûn te bidden,
sloech in krús, rôp fjurrich oan de Geast
dat wetter út ’e himel kaam,
dan kriich de hear ek syn gerak…
de tsjerke siedde.
Wa’t rispe hie, wie faak de rike,
fan ’t gehiel kriich hy it aldermeast:
in hiele keppel tsjin ien laam;
jûn rûn it oars, ’t wie duvelsk raar
lykas ’t no like.
* Aert van der Neer (1603-1677)
Skilderij ‘Utslaande brân op in kastiel’
(detail)