juli 1, 2019
Gjin weet noch fan klimaatferoaring,
fan de omslach by de raaigersboer,
dy’t ferballe hie ’t ferskaat oan blommen
om’t iensidich fretten better wie,
hy liet him net omkomme.
Hy kaam oer ‘t leechlân yn bekoaring,
dêr’t it peil stie op in heech nivo,
dat it tilde op fan gers mei blommen,
wat foar him it alderheechste wie
om ta syn rjocht te kommen.
Dêr wist hy him te profilearjen
as bewekker fan ’t natuergebiet
mei it read om fierder net te kommen
as de grins, dêr’t hy syn stânplak hie
om oer it gea te rommen.
juni 30, 2019
fan ûnbekend*
fan Marcel Duchamp**
Lit de opgong wêze foar Marcel,
dy’t jong al libbe tusken skilderijen,
yndruk út ’e âlde tiid,
hy gie net alle dagen derby del,
de takomst mocht er leaver lije.
Futurisme seach er oan de kym,
dêr soed er stap foar stap foar stap wol komme,
út ’e hichte nei de grûn,
net realistysk, derby del as skym,
wat koe ’t ferline him dan bomme.
Bleat rûn hompend by de treppen del
de djipte yn, op doek mei ien diminsje
ekstra, oan gjin noarmen bûn,
hoefolle stappen ek, ’t wie net yn tel…
wie bleate delgong syn yntinsje?
Lit de opgong wêze foar Marcel,
dy’t âlde keunst fan ’t statyske befrijde,
’t kaam úteinlik dêrop del.
* Foto ‘Marcel Duchamp’
** Skilderij ‘Bleat giet by de treppen del’