juni 20, 2019
fan Théodore-Joseph Geirnaert*
Koe sy der wat oan dwaan
dat har man tefolle dronk
en dus te min betelle,
wêr’t noch bykaam heit syn slaan.
Koe hy der wat oan dwaan
dat de hân tefolle skonk,
hy koe it tal net telle,
dat it koste him syn baan.
Koe hy der wat oan dwaan
as de tsjinstfeint fan ’t gerjocht,
hy woe har net bestelle,
koe perfoarst gjin útstel jaan.
Koe ’t kroas der wat oan dwaan,
bern dêr’t mem gjin klean foar kocht,
wat koe sy har fertelle
oars as: ‘Moatst heit mar ferjaan.’
Net yn ’t gewoane dwaan,
want it like nearne nei
sa’t alles bûten helle
waard om slachjes út te slaan.
* Théodore-Joseph Geirnaert (1790-1859)
Skilderij ‘Ferkeap nei beslachlizzing’
juni 19, 2019
fan Peter Paul Rubens*
Jim witte, Titus is myn maat
yn ’t leauwe, ek myn reisgenoat,
giet út himsels nei jimme ta,
de iver wâlet út syn aard.
Twa maten giene mei op reis,
rop harren ek it wolkom ta,
ferlet fan min praat ha se net,
se binne leauwich ûnderweis.
Se bringe harren leauwe oer
en roppe goederjouskens op;
jim ha al faker jeften jûn,
dat skinke is foar jim gjin toer.
Wa’t sieddet mei in romme hân,
sil rispje mear as dûbelop,
want God skinkt oan wa’t oaren jout,
sadat ûntstiet de bruorrebân.
* Peter Paul Rubens (1577-1640)
Skilderij ‘Apostel Paulus’