juli 4, 2019
fan William Turner*
Kin in minske heger komme
as Sint Gotthards heechste top?
Hy stekt de goaden nei de kroan,
de sterkste nimt it foar de duvel op,
want beide kin it neat ferdomme…
… dat de swakken djipper falle
as Sint-Gotthards wetterfal,
dy’t mei geweld en wyt fertoan
sprekt oan en nimt ek oan in driigjend stal,
lykas de sterken it graach wolle.
Wit dat duvels brêgen bouwe,
foar de iene om deroer,
de oare glydt der raar bydel,
de huorrerinder komt sa by de hoer,
dy’t fallen is yn duvels klauwen.
Sjoch, ynienen stiet de bôge
boppe brêge, pas en fal
as kompensaasje foar de hel;
de swakke skôget alle kleuren al,
de sterke fielt de hjitte lôge.
* William Turner (1775-1851)
Skilderij ‘De Duvelsbrêge, Sint Gotthardpas’
juli 3, 2019
fan ûnbekend*
Galatiërs , ûnnoazel folk,
jawis, ik skeld jim hjirfoar út,
jim ha de wet foar eagen:
inkeld letters en dus minskewurk,
de flok oer wa’t him dêroan hâldt.
Galatiërs, de Geast is tolk
foar jim, dy leit Gods Skriften út:
wa’t leaut yn Kristus’ wurden,
wurdt beholden, want dat wie syn wurk,
syn ierdske wei is ús behâld.
It is begûn mei Abraham,
want hy kaam foar syn leauwe út,
troch him krijt elk de seine
dy’t út leauwe libbet, net troch wurk
dat foarskreaun wurdt… de wet is kâld.
Yllustraasje ‘De wet en de belofte’