juli 6, 2019
fan Meester Arnt van Kalkar*
Myn leave bern, hoe ha ’k it no
mei jim as slaven fan de goaden?
Ha ’k jim God net kennen leard
om Him mei hert en siel te tsjinjen?
It giet no op ’e kop ferkeard,
foar’t jim dy stjitte, rop ik: ‘Ho!’
Wurd nei de geast oan my gelyk,
want ik bin ek gelyk oan jimme
wurden; net nei ’t lichem dat
doe siik wie, dochs ha ’k jimme tsjinne
en jimme my, dat die my wat,
as wie ’k Gods ingel, himelsk ryk.
Ik ha it no by jim bedoarn,
as wie ik jimme grutste fijân,
want kweamachten ha it wûn
as jimme net werberne binne,
dus libje nei de geast ynsûn,
oars bin ik glêd mei jimme oan.
* Atelier ‘Meester Arnt van Kalkar’ (ein 15e iuw)
Byld ‘Apostel Paulus’
juli 5, 2019
fan Peter Paul Rubens*
Ien fan de trije generaasjes
mei deselde namme yn it ryk
fan Rome: Decius,
dy’t konsul en ek fjildhear wie,
grut wiene syn prestaasjes.
’t Gie tsjin de Kelten en Etrusken,
’t meunsterbûn oan Romes macht gelyk,
in slach foar Decius,
dy’t yn in dream wist wêr’t er stie,
hy kaam der stridend tusken.
De Kelten krongen fier nei foaren,
dat foar Decius wie gjin ûntwyk,
hy rôp de goaden oan,
woe dat hysels it offer wie
en sparre sa de oaren.
Syn heit en pakesizzer wiene
like moedich yn ’t Romeinske ryk…
har namme: Decius.
* Peter Paul Rubens (1577-1640)
Skilderij ‘De dea fan Decius Mus’